S'ischiglia 2000

Su mundu a fundu in susu

O ominis de bonu sentidu,

ascurtai, ascurtai beni

ita hanti stabiliu e fattu,

gentalla cun su ciorbeddu sbuidu:

de su totu furriau hanti su mundu,

postu dd'hanti a peis in attu

e conca a basciu!

Mancai siat tundu,

e a is polus unu pagu strecau,

a fundu in su su dd'hanti girau.

Po cantu pagu cumprenda,

de una cosa seu prus che tzertu:

funt ministus de coixedda,

cun su coru tostau che perda.

Guai, est scrittu, a chini zerriat

su mali beni e su beni mali;

guai, 'olit nai, a chini zerriat

sa gherra destruidora,

umanitaria e pretziada,

e intelligentis is bombas,

e ddas ghetada a iscarada,

a sa cumenti bessit,

in conca 'e sa genti,

bocendi, a sa zurpa,

malus e notzentis,

e zerriant effettus collateralis

is matanzas bestialis,

chi in totus is cruelis gherras,

funt is prus ispramosus malis.

Giampaolo Caria