S'ISCHIGLIA - 1995

Su fueddu de is sapius

Intendei, intendei ita nanta

is ominis sapius,

sboddiendi is misterius eternus:

s'universu s'est formau a casu;

a casu puro sa terra,

e propiu in cust'era,

s'arradiu e su computer;

a sa matessi manera, una folla,

su profumu de una rosa,

s'arrisu e su prantu de unu pipiu,

de s'akili su bolidu,

sa boxi 'e s'arrosinnyolu.

No c'esti, custus nanta,

niscunu progettu,

niscunu architettu,

ni esistit niscunu deus,

ni umanidadi ki creada;

totu s'est fatu a casu!

Narai perou bosatrus,

ita pensai depeus

de custa genti sapia,

ki, nimancu sa sorti,

cumbintus creeus,

joghendi a barrallicu,

est arrennescia mai,

aiei scimprotedda,

a 'ndi fabbricai peus.

Giampaolo Caria