S'ISCHIGLIA - 1995

Hapu sonnau

Hapu sonnau

chi femu torrau picciocheddu

e andamu a iscola

po imparai sa storia de s'isula nosta.

In sa crassi femus in tantis,

de donnia parti de sa Sardigna,

perou si cumprcndemus a pari.

Su maistu spiegada

chi unu tempus sa Sardigna

fiat unu mugoni 'e linguas

e domia lingua teniat cunfinis

formendu una spetzia de istadu a sei,

e nemus insandus scriiat in sardu.

Poi, a pagu a pagu, cun su tempus,

po obera de tantis bonus iscriidoris

e de ominis valentis e studiaus,

una fueddada in mesu 'e is tantis

hiat pigau  pei suba de is ateras,

ma arricchendusì de icussas lassadas,

e assumendi in sei sa sustantzia

de sa curtura de totus is sardus,

formendu aici una nazioni unia.

Aciungiat ancora su maistu

chi no si depeus ponni tropu pensamentu

de cumenti cambiada una lingua,

ca su chi contada esti chi 'ndi tengaus una

de podiri trasmiti, studiai e amellorai,

poita unu populu si perdit sa lingua sua

morit e no resuscitat prusu,

e si 'ndi perdit po finas sa memoria.

Oindì sa genti 'olit essi unia

alloghendi, perou, sa propia identidadi e

autonomia,

sinnu custu de maduresa e de giustizia.

Tot'in d'unu perou,

prima chi su maistu acabessidi,

m'indi seu scidau, pensendi:

ma it'arratza 'e sonnu tontu est custu?

Piccioccu, mi seu nau, no cretas in sonnus!

E aici mi seu torrau a dromidi,

sperandu in coro de torrai a sonnai.

Giampaolo Caria